Sammele wurk

Tjitte Piebenga (1935-2007) wie ien fan de wichtichste Fryske modern-klassike skriuwers, sawol fan proaza as fan poëzij. Syn wurk hat boppedat bûten-literêre betsjutting mei’t hy as earste yn Nederlân de tematyk fan ‘bern fan in foute heit’ nei foaren brocht. Piebenga wie in tige produktyf skriuwer. Fan it proaza is al it yn boekfoarm publisearre literêre wurk yn dizze boks mei ‘Sammele wurk’ opnaam, plus de ferhalen dy’t Piebenga nei 1970 skreau en dy’t foar in grut part yn literêre tydskriften publisearre waarden. Fan it poëtysk oeuvre binne behalve de publisearre fersebondels ek de bondels opnommen dy’t Piebenga yn eigen behear útjûn hat, de fersen dy’t yn tydskriften ferskynd binne en de noch net earder publisearre fersen.